हेटौँडा, कात्तिक ९ गते ।
मकवानपुरको मकवानपुरगढी गाउँपालिका –७ दुम्सीडाँडास्थित भित्री कच्ची सडकखण्डमा अटो दुर्घटना हुँदा सात जना घाइते भएका छन् ।
दुम्सीडाँडाबाट हेटौँडातर्फ आउँदै गरेको ना २ ह ५१७४ नम्बरको अटो अनियन्त्रित भइ सडकबाट करिब ३०–३५ फिट तल खसेर दुर्घटना भएको हो ।
अटोमा परी मकवानपुर गढी गाउँपालिका ७ सुकौराका वर्ष २३ की मनिता मोक्तान, उहाँको छोरी दुई महिनाकी जानुका जिम्बा, मकवानपुरगढी ७ सुकौराका वर्ष २९ का कृष्णबहादुुर.योन्जन, निजको छोरी वर्ष ८ की सारोक्षा योन्जन, सोही स्थान बस्ने वर्ष २६ की दिलमाया योन्जन, वर्ष २२ की हिरामाया योन्जन र वर्ष २२ को विकास योन्जन मोक्तान घाइते भएको जिल्ला प्रहरी कार्यालय मकवानपुरले जनाएको छ ।
प्रहरीका अनुसार घाइतेमध्ये पाँच जनाको हेटौँडा अस्पतालमा उपचारपछि घर फर्किएका छन् । साथै मनिता मोक्तान र निजकी छोरी जानुका जिम्बाको अवस्था गम्भीर भएपछि हाल चितवनको पुरानो मेडिकल कलेजमा उपचारका लागि पठाइएको छ ।
