हेटौँडा, चैत २० गते । मकवानपुरको भीमफेदीस्थत नेपाली सेनाको बहुउद्देश्यीय प्लास्टिक कारखाना परिसरमा रहेको सेनाको ब्यारेकमा आगलागी भएको छ । बुधबार बिहान आगलागीबाट सेनाको जवान बस्ने भवन जलेर नष्ट भएको हो ।
इलाका प्रहरी कार्यालय भीमफेदीका प्रहरी निरीक्षक ललिता ढकालले विद्युत् सर्ट भएर सेनाको जवान बस्दै आएको ब्यारेकका करिब १० वटा कोठामा पूर्णरुपमा क्षति पुगेको जानकारी दिनुभयो ।
उहाँले बिहान ७ः३० बजेको समयबाट आगलागी सुरु भएको भन्दै काठ र माटोले बनेका घर भएकाले आगलागी नियन्त्रणमा समस्या भएको बताउनुभयो ।
‘‘सेनाका जवान बस्दै आएको भवनको एक तिहाई भाग जलेर नष्ट भएको छ,’’ उहाँले भन्नुभयो, ‘‘राणाकालीन माटो र काठले बनेको घर भएकोले दमकल प्रयोग गरेर पनि आगलागी नियन्त्रणमा लिन समस्या भयो ।’’
उहाँले आगलागीबाट मानवीय क्षति नभएको र ब्यारेकमा रहेका सामानहरु निकालिएको बताउनुभयो ।
