हेटौँडा, चैत २० गते ।
बागमती प्रदेश सरकारलाई विपत् पछिको मूल्याङ्कन प्रतिवेदन बागमती प्रदेश सभा अर्थ तथा विकास समितिले बुधबार बुझाएको छ ।
गत असोजको दोस्रो साता बागमती प्रदेशका विभिन्न जिल्लामा अविरल वर्षाका कारण भएको क्षति र त्यसपछिको पुनर्निर्माणलगायतका विषय समेटेर तयार गरिएको प्रतिवेदन बागमती प्रदेशका मुख्यमन्त्री बहादुर सिं लामा तामाङ र प्रदेशका आन्तरिक मामिला तथा कानुनमन्त्री सुरजचन्द्र लामिछानेलाई बुझाइएको हो ।
बागमती प्रदेश सभा अर्थ तथा विकास समितिको निर्देशनमा प्रदेश नीति तथा योजना आयोग बागमती प्रदेशका उपाध्यक्ष डा. गंगादत्त नेपालको नेतृत्वमा अध्ययन गरी उक्त प्रतिवेदनमा तयार गरिएको थियो ।
प्रदेश सभाका सदस्य सुना परियारले बागमती प्रदेश सरकारले उक्त प्रतिवेदनलाई ग्रहण गरी क्रमशः कार्यान्यनमा लैजाने विश्वास व्यक्त गर्नुभयो ।
साथै प्रदेश सभाको अर्थ तथा विकास समितिको बैठकले प्रदेश सरकारलाई उक्त प्रतिवेदनलाई कार्यान्वयनसमेत निर्देशन दिएको छ ।
विपत् पछिको मूल्याङ्कन प्रतिवेदन मुख्यमन्त्रीलाई बुझाइयो
