नेपालगन्ज , चैत २१ गते ।
नेकपा माओवादी केन्द्रका अध्यक्ष एवम् पूर्व प्रधानमन्त्री पुष्पकमल दाहाल प्रचण्डले जनतासँगको सम्बन्ध सुदृढ गर्ने उद्देश्यका साथ जनताका कुरा सुन्न देश दौडाहामा रहेको बताउनुभएको छ ।
नेकपा माओवादी केन्द्र जिल्ला समन्वय समिति बाँकेले आज नेपालगन्जमा आयोजना गरेको नागरिक अन्तर संवाद कार्यक्रममा बोल्दै अध्यक्ष प्रचण्डले विगतमा केही गल्ती भएको समीक्षासहित पार्टी रुपान्तरणको निम्ति अघि बढेको उल्लेख गर्नुभयो ।
प्रचण्डले मुलुक ठूलो दुर्घटनामा जाने अनुभूत गर्दै पार्टीलाई सच्याएर जानुपर्दछ भन्ने आत्मबोध भएपछि जनताको बीचमा गइरहेको बताउनुभयो । उहाँले जनताको बीचमा जाँदा ऊर्जा प्राप्त भइरहेको समेत बताउनुभयो । अध्यक्ष प्रचण्डले चैत १५ गतेको प्रदर्शनबाट राजावादीहरूको चरित्र छर्लङ्ग भएको जिकिर समेत गर्नुभयो ।
कार्यक्रममा माओवादी केन्द्रका नेताहरू नारायणकाजी श्रेष्ठ, कृष्ण बहादुर महरा, अग्नि सापकोटा, पम्फा भुसाल, देव गुरुङ लगायतको उपस्थिति थियो । माओवादी केन्द्रका बाँके जिल्ला संयोजक नरेन्द्र पाण्डे ‘जेम्स’ को सभापतित्वमा कार्यक्रम सम्पन्न भएको थियो ।
