नुवाकोट- आयआर्जनमा जोड दिँदै होमस्टे अभियानलाई प्रभावकारी बनाउनु पर्ने नुवाकोटमा आयोजित कार्यक्रममा जोड दिइएको छ । होम स्टेले पर्यटन प्रवर्द्धनका साथै स्थानीयवासीको आयआर्जन र स्वरोजगारमा महत्त्वपूर्ण भूमिका रहने भएका कारण नेपालमा यसलाई प्रभावकारी रूपमा कार्यान्वयन गरिनुपर्ने निष्कर्ष निकालिएको छ ।
नुवाकोटको महत्त्वपूर्ण पर्यटकीय तथा सांस्कृतिक महत्त्व बोकेको सात तले दरबार परिसरमा आयोजित अन्तर्क्रियामा आर्थिक उन्नति तथा स्थानीय संवृद्धिका लागि होमस्टेलाई प्रमुख अभियानका रूपमा अगाडि लैजानु पर्ने ठहर गरिएको हो । बागमती प्रदेश संस्कृति तथा पर्यटन मन्त्रालय र गाउँ पर्यटन प्रवर्द्धन मञ्चको संयुक्त आयोजनामा सम्पन्न अन्तर्क्रियामा सरोकारवाला पर्यटन व्यवसायी, जनप्रतिनिधिले सो निष्कर्ष निकालेका हुन् ।
नुवाकोट भ्यु सामुदायिक होम स्टेको व्यवस्थापनमा “गन्तव्य पहिचान प्रवर्द्धन र प्रचार “विषयक अन्तर्क्रियामा बागमती प्रदेशको संस्कृति तथा पर्यटन मन्त्रालयका सचिव दीपेन्द्र सुवेदीले देशको संवृद्धिका लागि पर्यटन मुख्य रहेको र यसमा होमस्टेले योगदान पुर्याएको वताउनुभयो । सोही कार्यक्रममा विदुर नपाकी उपमेयर प्रभा बोगटीले नगरले होमस्टे अर्थात् घर बास कार्यक्रमबाटै स्थानीयवासीको आयआर्जन तथा स्वरोजगारको अभियान सुरु गरेको वताउनुभयो ।
