काठमाडौँ, वैशाख १६ गते । नेपाली कांग्रेस केन्द्रीय अनुशासन समितिको वैठकले पूर्व कार्यवहाक सभापति पूर्णबहादुर खडकालाई सोधिएको स्पष्टिकरणको प्रकृयालाई तामेलीमा राख्ने निर्णय गरेको छ । सर्बोच्च अदालतले विशेष महाधिवेशनलाई मान्यता दिने फैसला गरेसँगै खड्काको कारवाही प्रकृया स्वत: रोकिएको हो ।
यसैगरी, नेपाली काँग्रेस रामेछाप जिल्ला सभापति पुर्ण बहादुर तामाङ (कान्छाराम) लाई जिल्ला सभापति पदमा रही काम गर्न नपाउने गरी निलम्बन पनि अनुशासन समितिले गरेको छ। पार्टी नेतृत्वका विरुद्धमा वदनियत राखी भ्रमपूर्ण र तथ्यहिन अभिव्यक्ति दिएको भन्दै तामाङलाई निलम्बन गरिएको काँग्रेसले जनाएको छ । साथै, काँग्रेसले गत फागुनको निर्वाचनमा पार्टी अनुशासन उल्लंघन गर्नेहरुलाई ७ दिनभित्र विभिन्न माध्यममार्फत स्पष्टिकरण बुझाउन पनि भनेको छ ।
काँग्रेसले प्रतिनिधिसभाको निर्वाचनमा पार्टीको आधिकारिक उम्मेदवारविरुद्ध असहयोग गर्ने विभिन्न सदस्यहरूलाई पाँच दिनभित्र स्पष्टीकरण पेस गर्न निर्देशन दिएको छ । पार्टीको केन्द्रीय अनुशासन समितिको आज बसेको बैठकले पार्टीको आधिकारिक उम्मेदवारविरुद्ध असहयोग गर्ने व्यक्तिहरूलाई समितिमा स्पष्टीकरण पेस गर्न पत्राचार गर्ने निर्णय गरेको हो ।
समितिका संयोजक तारामान गुरुङको संयोजकत्वमा बसेको बैठकले पार्टीका महासमिति सदस्य एवं लुम्बिनी प्रदेशका वनमन्त्री देवकरणप्रसाद कलवार (सन्तु), पूर्वकेन्द्रीय सदस्य एवं कोशी प्रदेशका मन्त्री प्रदीप सुनुवार, लुम्बिनी प्रदेशका यातायात तथा पर्यटन मन्त्री प्रचण्डविक्रम न्यौपानेलाई स्पष्टीकरण सोध्ने निर्णय गरेको हो । त्यस्तै,पार्टीको प्रदेश उपसभापति एवं लुम्बिनी प्रदेशका प्रदेशसभा सदस्य राजु खनाल तथा प्रदेश सदस्यहरू जङ्गीलाल राय, सकुन्तीदेवी महरा र कौशलकिशोर रायलाई स्पष्टीकरण सोध्ने निर्णय गरेको पार्टीका कार्यवाहक मुख्यसचिव कृष्णप्रसाद दुलालले जानकारी दिनुभयो ।
