काठमाडौँ, वैशाख ३० गते । प्रतिनिधि सभाको आजको बैठक प्रतिपक्षीहरुको विरोधका कारण स्थगित भएको छ। भोलि बैशाख ३१ गते बिहीबार विहान ११ बजे बस्ने गरी बैठक स्थगित गरिएको हो । आजको बैठकमा सरकारको नीति तथा कार्यक्रममाथि सांसदहरुले उठाएका प्रश्नहरुको जवाफ प्रधानमन्त्रीले दिने कार्यसूची थियो । तर ढिलागरी प्रधानमन्त्री बैठकमा आउन नसक्ने सूचना आएपछि संसदमा विपक्षीहरुले विरोध गर्न थालेका थिए ।
प्रमुख प्रतिपक्षी दल नेपाली काँग्रेसलगायत एमाले, नेकपा, श्रम संस्कृति पार्टी र राप्रपाका सांसदहरुले प्रधानमन्त्री संसदमा उपस्थित भएपछि मात्र बैठक अघि बढाउन भन्दै उठेर विरोध गरेका थिए । सभामुख डिपी अर्यालले पटक पटक सांसदहरुलाई बैठक सुचारु गर्न आग्रह गरेपनि विपक्षीहरुले अडान छाडेनन् र बैठक दुई पटकसम्म स्थगित भयो ।
बैठक सुचारु गर्ने विषयमा विभिन्न दलका नेताहरुसँग सभामुखले चलाएको छलफल पनि निष्कर्षमा पुगेन । तेश्रो पटक बसेको बैठकमा पनि अवरोध कायम भएपछि सभामुख अर्यालले आजको कार्यसूचीमा रहेका विषयहरु सबै हटाएर भोलिको लागि सारेको जानकारी दिनुभयो । भोलि विहान ११ बजे बस्ने संसदको बैठकमा सांसदहरुले सरकारको नीति तथा कार्यक्रममाथि राखेका संशोधन प्रस्तावमाथि छलफल हुने र प्रधामन्त्रीले संसदमा उठेका विषयको जवाफ दिने कार्यक्रम रहेको पनि सभामुखले जानकारी दिनुभयो ।
