काठमाडौँ, असार १० गते । राष्ट्रिय स्वतन्त्र पार्टी (रास्वपा)को केन्द्रीय सदस्यमा उम्मेदवारी दिएकाहरूको नामावली सार्वजनिक गरिएको छ । रास्वपाको चितवनमा जारी महाधिवेशनमा केन्द्रीय निर्वाचन आयोगले नामावलीमा ३ सय ८४ जनाको नाम सार्वजनिक गरेको हो । रास्वपाका प्रवक्ता मनिष झाले उम्मेदवारको प्रारम्भिक नाम सार्वजनिक भइसकेको बताउनुभयो ।
मतदान सुरु भएको ४ घण्टामा मतदान प्रक्रिया सकिने आकलन रहेको र मतदान सकिएको २ घण्टामा अन्तिम मतपरिणाम सार्वजनिक गर्ने तयारी रहेको पनि प्रवक्ता झाले बताउनुभयो । रास्वपाको संशोधित विधान अनुसार १ सय ५८ जना केन्द्रीय सदस्य हुने व्यवस्था छ । जसमध्ये ९९ जना निर्वाचित हुने छन् भने ५१ जनालाई सभापतिले मनोनीत गर्ने व्यवस्था गरिएको ।
त्यस्तै, ७ जना प्रदेश सभापतिहरू पदेन सदस्य हुने भएकाले स्वतः केन्द्रीय सदस्य रहनेछन् । सभापतिमा रवि लामिछाने निर्विरोध निर्वाचित भइसक्नुभएको छ भने केन्द्रीय सदस्यहरूको निर्वाचन प्रक्रिया भइरहेको छ ।
