हेटौँडा, वैशाख १ गते ।
बागमती प्रदेशका प्रदेश प्रमुख यादव चन्द्र शर्माले प्रमुख शर्माले नयाँ वर्षलाई नवीन अवसर र सम्भावनाहरूको पहिचान गर्दै स्वागत गर्न सक्नुपर्ने बताउनुभएको छ । प्रदेश प्रमुख शर्माले आज शनिवार नयाँ वर्ष २०८१ को अवसरमा शुभकामना सन्देश जारी गर्दै यस्तो बताउनुभएको हो ।
उहाँले नयाँ वर्षको अवसरमा प्रदेशवासी साथै स्वदेश तथा विदेशमा रहनुभएका सम्पूर्ण नेपाली दाजुभाइ एवं दिदिबहिनीहरुमा सुख, शान्ति, समृद्धि, सुस्वास्थ्य एवं दीर्घायुको लागि शुभकामना व्यक्त गर्नुभएको हो ।
‘एउटा साल सकिएर अर्को सुरुवात हुनु मात्र नयाँ वर्ष होइन । नयाँ वर्षको आगमनसँगै हाम्रा भित्तामा झुन्डिएको भित्ते पात्रो फेरिनु मात्र पनि नयाँ साल आएको रूपमा बुझ्न सकिन्न ।’ उहाँको शुभकामना सन्देशमा भनिएको छ, ‘ नवीन अवसर र सम्भावनाहरू पहिचान गर्दै हामीभित्र रहेका निराशालाई चिर्ने सुखद दिनका रूपमा नयाँ सालको स्वागत गर्न सक्नुपर्छ ।’
शुभकामना सन्देशमा स्वदेशमै रोजगारीको वातावरण सिर्जना गरी बिदेसिने बाध्यताको अन्त्य गर्न, नागरिकको जीवनसँग प्रत्यक्ष सरोकार राख्ने शिक्षा,स्वास्थ्य,कृषि र वातावरण संरक्षणजस्ता विषयलाई उच्च प्राथमिकतामा राख्ने नीति निर्माण गर्दै तीनै तहका सरकार योजनाबद्ध रूपमा क्रियाशील रहने प्रतिबद्धता व्यक्त गर्ने दिन, यो नयाँ वर्ष बन्न सकोस् भनिएको छ । नयाँ वर्षसँगै अझ संविधानको पूर्ण कार्यान्वयन,राजनीतिक स्थायित्व, दिगो शान्ति तथा सुदृढ राष्ट्रिय एकता र समृद्धि हासिल गने दिशामा सम्बन्धित पक्षहरूलाई सफलता मिलोस् भन्ने कामना प्रदेश प्रमुख शर्माले गर्नुभएको छ ।
गएको सालको बिदाइ र नयाँ साललाई स्वागत गरिरहँदा विगतको अनुभव र सिकाइलाई हामीले सदैव आत्मसात् गर्नुपर्ने भन्दै उहाँले देशका सबै पक्षबिच आपसी मेलमिलाप, सद्भाव एवम् सहिष्णुतापूर्वक अघि बढेमा पक्कै पनि ‘एकतामा नै बल हुन्छ’ भन्ने भाव पुष्टि हुने बताउनुभयो एको छ । प्रमुख शर्माले नयाँ जोस–जाँगरसहित देश निर्माणको महाअभियानमा एकाकार हुन हामी सबैलाई आजैको दिनले अभिप्रेरित गरोस् भन्नुभएको छ ।
