मकवानपुर, पुस १३ गते । मवानपुरमा भएको छुट्टाछुट्टै दुर्घटनामा एकको मृत्यु र पाँच जना घाइते भएका छन् । पूर्व पश्चिम राजमार्गअन्तर्गत हेटौँडा उपमहानगरपालिका १९ बस्तीपुरस्थित सडक खण्डमा बाटो क्रस गर्दै गर्दा मोटरसाइकलले ठक्कर दिएर घाइते भएका पैदल यात्री मकवानपुरको मनहरी गाउँपालिका ३ का रघुनाथ पौडेलको उपचारको क्रममा शनिबार राति मृत्यु भएको हो ।
गत मङ्गलबार मोटरसाइकलको ठक्करबाट घाइते भएका ७० वर्षीय पौडेलको नयाँ मेडिकल कलेज भरतपुर चितवनमा उपचारको क्रममा शनिबार राति चिकित्सकले मृत घोषणा गरेको बागमती प्रदेश प्रहरी कार्यालय हेटौँडाले जनाएको छ ।नेवारपानी तर्फबाट बस्तीपुरतर्फ जाँदै गरेको बा.प्र.०३–००५ प ६४२९ नं.को मोटरसाइकलले पौडेललाई ठक्कर दिई दुर्घटना हुँदा मोटरसाइकल चालक हेटौँडा १९ बस्तीपुरका वर्ष २७ का विजय घलान र पछाडि सवार वर्ष १८ का रोशन गोलेसमेत घाइते हुनुभएको थियो । घाइते दुई जनाको सिएमसी चुरेहिल अस्पतालमा उपचार भएको छ ।
यस्तै, मकवानपुरगढी गाउँपालिका ६ भालुखोलास्थित भित्री सडक खण्डमा प्र.३–००१४ प ५६६९ को मोटरसाइकल गएराति अनियन्त्रित भइ दुर्घटना हुँदा दुई जना घाइते भएको प्रहरीले जनाएको छ । दुर्घटनापछि अस्थायी प्रहरी पोष्ट धादिङ मकवानपुरबाट गएको प्रहरी टोलीले धादिङ बजारबाट हेटौँडा बजारतर्फ आउँदै गरेको मोटरसाइकल अनियन्त्रित भई सडकभन्दा अन्दाजी १० मिटर तल खोल्लामा खसेर दुर्घटना भएको पाइएको जनाएको छ । दुर्घटनामा घाइते भएका मोटरसाइकल चालक मकवानपुरगढी गाउँपालिका ३ मक्रान्चुलीका ३१ वर्षीय बुद्ध लामाको पुरानो मेडिकल कलेज भरतपुर र पछाडि सवार मकवानपुरगढी ८ बुढिचौरका २५ वर्षीय देबेन्द्र बोम्जनको सन्चो अस्पताल हेटौँडा लगिएकोमा उपचार भइरहेको छ ।
यसैगरी, मदन भण्डारी लोकमार्गको हेटौँडा उपमहानगरपालिका १६ सिपाली चोकमा सवारी दुर्घटनामा एक जना घाइते भएका छन् । गएराति हटिया तर्फबाट ठुलोदमारतर्फ जाँदै गरेको बागमती प्रदेश ०३–००१क ०१४३ नं.को टिपरले सोही दिशातर्फ जाँदै गरेको बागमती प्रदेश०३–००३ प ३१९२ नम्बरको मोटरसाइकललाई ठक्कर दिँइ दुर्घटना हुँदा मोटरसाइकल चालक हेटौँडा १७ का ४२ वर्षीय मानबहादुर मानन्धर घाइते हुनुभएको छ । दुर्घटनापछि फरार रहेका टिपर चालक मकवानपुरगढी ७ स्थित सुकौराका अन्दाजी ३५ तिलकबहादुर पाख्रिनलाई जिल्ला प्रहरी कार्यालय मकवानपुरले नियन्त्रणमा लिएको छ । घाईते मानन्धरलाई हेटौँडा अस्पतालमा उपचारपछि थप उपचारको लागी पुरानो मेडिकल कलेज भरतपुर चितवन पठाइएकोमा उपचार भइरहेको र अवस्था गम्भीर रहेको प्रहरीको भनाइ छ ।
