जेन-जीहरुसँगको सम्झौतालाई छिटो अन्तिम रुप दिन प्रधानमन्त्रीको निर्देशन

काठमाडौँ, मङ्सिर १२ गते । प्रधानमन्त्री सुशीला कार्कीले जेन-जीहरुसँगको सम्झौता तत्काल टुङ्ग्याउन सरकारी अधिकारीहरुलाई निर्देशन दिनुभएको छ। प्रधानमन्त्री कार्कीले आज जेन-जी आन्दोलनका अगुवाहरुसँग छलफलका क्रममा उनीहरुकै अगाडि सरकारी प्रतिनिधिहरुलाई ढिलोमा आगामी सोमबारसम्म सम्झौतालाई अन्तिम रुप दिन निर्देशन दिनुभएको हो ।

सरकार र आन्दोलनकारीबीच हुन लागेको सम्झौताको मस्यौदालाई अन्तिम रुप दिने विषयमा आज सिंहदरबारमा छलफल भएको हो। छलफलमा प्रधानमन्त्री कार्कीले हस्ताक्षर गरेकै कारणले केही बेहोर्नुपरे प्रधानमन्त्रीको हैंसियतले आफूले र  सिंगो मन्त्रिपरिषद्ले त्यसको जिम्मेवारी लिने प्रतिवद्धता व्यक्त गर्नुभयो ।

जेन-जीसँग गरिने सम्झौता राजनीतिक दस्तावेज हुने भएकोले कर्मचारीहरुले चिन्ता लिन नपर्ने भन्दै प्रधानमन्त्री कार्कीले सरकारी अधिकारीहरुलाई ताकेता गर्नुभएको थियो । छलफलमा सहभागी जेन-जी अगुवाहरुले सरकारसँगको सम्झौता छिटो गर्न प्रधानमन्त्रीलाई सामुहिक आग्रह गरेका थिए ।