खासकुरा संवाददाता
हेटौँडा, मङ्सिर १२ गते । सडक डिभिजिन, हेटौँडाले हेटौँडा बजार क्षेत्रमा सडक चौडा गर्ने सूचना जारी गरेसँगै स्थानीय बासिन्दा आतङ्कित बनेका छन् ।
सडक डिभिजिनले छोटो समयको १५ दिनको सूचना जारी गरेर मुआब्जा र क्षतिपूर्ति बिनानै नागरिकका घरटहरा भत्काउने तयारी गरेसँगै स्थानीय आतङ्कित बनेका हुन् ।
जग्गाको मुआब्जा र घरटहराको क्षतिपूर्ति माग गर्दै घरजग्गाधनी र व्यवसायी सडक डिभिजनको प्रतिवादमा उत्रन सङ्गठित हुने क्रम बढ्दो छ ।
यसैबीच नेपाल उद्योग वाणिज्य महासंघ बागमती प्रदेशका संस्थापक अध्यक्ष तथा मकवानपुर उद्योग वाणिज्य संघका पूर्व अध्यक्ष अरुणराज सुमार्गीले हेटौँडा सडक विस्तार कार्य घरजग्गा धनीलाई उचित मुआब्जा र क्षतिपूर्ति बिना तथा व्यवसायीको उचित व्यवस्थापन नगरी गर्नु अन्यायपूर्ण हुने बताउनुभएको छ ।
सुमार्गीले शुक्रबार हेटौँडामा पत्रकार सम्मेलन गरी राज्यले निजी सम्पत्ति प्रयोग गर्दा कानुनअनुसार मुआब्जा दिनु नैतिक र कानुनी दायित्व भएकाले त्यसका लागि लडाइँ जारी रहने बताउनुभयो ।
“सडक विस्तार रोक्ने पक्षमा छैन, तर घरजग्गाधनीले मुआब्जा र क्षतिपूर्ति पाउनै पर्छ,” उहाँले भन्नुभयो ।
पाँच हजारभन्दा बढी व्यवसायी रहेका छन्, उनीहरुको उचित व्यवस्थापन हुनुपर्ने उहाँको भनाई छ ।
उहाँले प्रश्न गर्नुभयो, हेटौँडा मानवता हराएको सहर हो वा मानवता नभएको दलहरु छन् ।
राजनीतिक दलले सडक विस्तारको सवालमा घरधनी र व्यवसायीहरुलाई भोट बैङ्क मात्र बनाएको र अहिले सरकारबाट आतङ्कित बनाउने काम गरेको उहाँको आरोप छ ।
उहाँले पत्रकार सम्मेलनमा भन्नुभयो, कि विकल्प देउ कि मुआब्जा देउ । गरी खानेलाई सडकमा नपु¥याउ । व्यवसायीहरुलाई समय देउ । पाँच हजारभन्दा बढी व्यवसायीहरु पोका पन्तारा बोकेर कहाँ जाने । अमानवीय रुपमा व्यवहार गरियो ।
उहाँले अगाडि भन्नुभयो, १५ दिनको सूचनाको आधारमा हामीसँग पर्याप्त डोजर लोडर छ भत्काउन तयार छौ भन्दै गर्दासमेत मानवता हराएको सहर हो वा मानवता नभएको दलहरु हो वा राज्य सञ्चालन गर्नेमा मानवता नहुने हो ? कहीँ कतैबाट सुनुवाई हुँदैन र गरिँदैन ।
सडक डिभिजनले हामीले डोजर लोडर भाडामा लिईसक्यौ राज्य संयन्त्रले डोजर लगाइदिन्छ भन्दा व्यवसायीमा त्रास सिर्जना भएको उहाँले बताउनुभयो ।
म पनि उद्योग वाणिज्य सङ्घको पूर्व अध्यक्ष हुँ, विकल्प पनि दिएको हो सडक पनि बनाएको हो तर दलहरु र स्थानीय सरकार अपनत्व लिन तयार भएनन् सुमार्गीले पत्रकार सम्मेलनमा गुनासो गर्नुभयो ।
उहाँले यहाँ भएको घरहरु भत्केपछि सबैलाई सन्तोष हुन्छ, व्यवसायीहरु विकास विरोधी हुन् भन्ने भाष्य बनाइएको भन्दै अहिले समस्याको दोष स्थानीय सरकारमा रहेका, सङ्घीय सरकारमा बसेकाहरु पात्रहरु र दलहरु भएको र उनीबाट अपेक्षा गर्न नसकेपछि पत्रकार सम्मेलन गरिएको उहाँले बताउनुभयो ।
या त निकास, निकास भनेको एकपटक मुआब्जा देउ, अहिलेनै दिन सकिँदैन भनेपनि हामी तयार । अहिले दिन सक्दै गरिब छ आर्थिक मन्दी छ भनेपनि पछि देओस् तर दिने सवालमा आश्वस्त पार्नु पछ, सुनिश्चित हुनुपर्छ उहाँले पत्रकार सम्मेलनमा स्पष्ट पार्नुभयो ।
द्रुतमार्गमा मुआब्जा र भैंसे–भीमफेदी सडकमा क्षतिपूर्ति दिन यो सडकमा किन विभेद कि यहाँका नागरिक तेस्रो दर्जाका हुन् भनियोस् । त्यो भन्ने हो भने अन्तर्राष्ट्रिय मुद्दा गर्न लागौला होइन भने निकास त दिनु प¥यो उहाँले भन्नुभयो ।
नागरिक भएको हैसियतले, लालपुर्जा भएका कारण जग्गाको मुआब्जा पाउने अधिकार हो । नपाउने हो भने यो कारणले पाउँदैन भन्नु पर्छ भन्दै उहाँले नगरपालिकाले अनुमति दिएर बनाएको घर हो, बैङ्कमा कारोवार पनि गरिएको छ, नक्सा पास पनि भएको छ, नगरपालिकालाई कर पनि तिरेको बताउनुभयो ।
उहाँले राज्यले हाम्रो समस्याको संवोधन गर्नुपर्छ, हामी वार्ता गर्न तयार छौ भन्दै आतङ्क सिर्जना भएको छ त्यो रोक्न सरकार संयम होस् । दलहरुले पनि सहयोग गर्नुस् जनतालाई सन्त्वना दिनुस् । आतङ्कित बनाइएको छ यसलाई रोक्नुपर्ने बताउनुभयो ।
