खासकुरा संवाददाता
हेटौँडा, पुस १२ गते । हेटौँडा उपमहानगरपालिका २ स्थित सिद्धार्थ माध्यामिक विद्यालयले स्थापनाको ५० औँ वर्षको अवसरमा स्वर्ण जयन्ती मनाउने भएको छ ।
आगामी माघ २ गतेदेखि ८ गतेसम्म विविध कार्यक्रमको आयोजना गरी स्वर्ण जयन्ती मनाउने भएको हो ।
स्वर्ण जयन्तीको तयारीको क्रममा विद्यालयले शनिबार विद्यालयको हलमा पूर्व विद्यार्थी, शिक्षक र कर्मचारीहरुसँग छलफल गरेको छ ।
छलफलमा स्वर्ण जयन्ती समारोहमा विद्यालयसँग विगत र वर्तमानमा जोडिएका सबै पक्षलाई समेट्दै अपनत्व महशुस गर्ने गरी मनाउन र विद्यालयको भावी दीर्घकालीन योजनाको खाका बनाउन सहभागीहरुले सुझाएका थिए ।
कार्यक्रममा पूर्व विद्यार्थी एवं बागमती प्रदेश सरकारका पूर्वमन्त्री एकालाल श्रेष्ठले सिद्धार्थ मावि यस क्षेत्रकै गौरवको शैक्षिक संस्था भएको भन्दै स्वर्ण जयन्ती समारोह स्मरणीय बनाउन सबैको सहयोग र सहकार्य आवश्यक भएको बताउनुभयो ।
कार्यक्रममा विद्यालयका प्रधानाध्याक परमानन्द सरोज कर्णले स्वर्ण जयन्तीका अवसरमा आयोजना गरिने कार्यक्रमहरुको बारेमा जानकारी गराउनुभएको थियो ।
स्वर्ण जयन्ती आयोजक मूल समारोह समितिका संयोजक एवं हेटौँडा उपमहानगरपालिका वडा नम्बर २ का वडाध्यक्ष विष्णुगोपाल महर्जनको अध्यक्षतामा भएको कार्यक्रममा विद्यालय सञ्चालक समितिका पूर्व अध्यक्ष एवं नारायाणी यातायात व्यवसायी संघका अध्यक्ष हिरालाल श्रेष्ठ, पूर्व विद्यार्थी एवं मकवानपुर उद्योग वाणिज्य संघका अध्यक्ष प्रमोदसिंह रानाभाट, विद्यालयका सहायक प्रधानाध्यमक रामशरण अधिकारी, विद्यालयको पूर्व प्रधानाध्यपक मोहन शर्मालगायत पूर्व विद्यार्थी, पूर्व शिक्षक, पूर्व कर्मचारीहरुले स्वर्ण जन्यती समारोह मनाउने सन्दर्भमा आफ्नो सुझावसहित धारणा राख्नु भएको थियो ।
