खासकुरा संवाददाता
हेटौँडा, मङ्सिर १३ गते । हेटौँडा उपमहानगर क्षेत्रमा सडक चौडा गर्ने नाममा सडक डिभिजन हेटौँडाले नागरिकमाथि आतङ्क सिर्जना गर्दै दमनको बाटो लिएको स्थानीयले आरोप लगाएका छन् ।
सडक डिभिजनले हेटौँडाको रातोमाटेदेखि सामरी पुल र बुद्ध चोकदेखि राप्ती पुलसम्म सडम सीमा खाली गर्न सडक डिभिजनले १५ दिने सूचना जारी गरेसँगै स्थानीय बासिन्दा आन्दोलित बनेका छन् ।
प्रभावित स्थानीय बासिन्दाले आफ्नो जग्गाको मुआब्जा र भौतिक संरचनाको क्षतिपूर्तिसँगै व्यवसायीको उचित व्यवस्थापनको माग गर्दै आएका छन् ।
मकवानपुर उद्योग वाणिज्य संघका पूर्व अध्यक्ष कृष्ण कटुवालले सडक विस्तारका नाममा सडक डिभिजन हेटौँडाले दमन गर्ने कार्य गरिरहेको बताउनुभएको छ ।
पूर्व अध्यक्ष कटुवालले सामाजिक सञ्जाल फेसबुकमा लेख्दै सडक डिभिजन हेटौँडाले दमनको झल्को दिने गरी काम गरिरहेको बताउनुभएको हो ।
सडक डिभिजनले विभिन्न कार्यालयलाई पत्राचार गरेर दमनको झल्को दिने यो के तरिका हो भन्दै उहाँले प्रश्न गर्नुभएको छ ।
उहाँले सामाजिक सञ्जाल फेसबुकमा लेख्नुभएको छ,भदौ २३ मा दमन गरेको भएर २४ को घटना घटेको जस्तै यसरी पेट्रोलियम पदार्थ बन्द गराउनतर्फ लाग्ने, बिजुलीको मिटर सार्न लगाउने, टेलिफोन खानेपानी लाई पत्राचार गरेर दमनको झल्को दिने यो के तरिका हो ?
कटुवालले अगाडि भन्नुभएको छ, हामीले अहिलेसम्म न मुआब्जा न क्षतिपूर्ति पाएका छौ । केही पाएका छैनौ । अनि हामीले सडक अतिक्रमण ग¥यो भन्ने कुरा कसरी मिल्छ ? म त भन्छु हामीलाई सडकले अतिक्रमण ग¥यो । अर्को कुरा मुआब्जा पहिले नै दिईसकेको भन्ने छ प्रमाण देखाई देओस् घर सरकारको नाममा गरी दिउला ।
मेरो बुवाले २०१२ सालमा हेटौँडामा घर बनाउनु भयो, सडक ऐनको २५ गजको निर्णय २०२१ मा भयो, नगरपालिका २०२६ सालमा स्थापना भयो, अनि सडक ऐन २०३४ ले सो २५ गजको निर्णय २५ मिटर बनायो उहाँले सडक सीमाका बारेमा स्पष्ट पार्नुभएको छ ।
प्रमुख जिल्ला अधिकारी, जिल्लाका कर्मचारी र मेयरलाई प्रश्न गर्दै मउवासंघका पूर्व अध्यक्ष कटुवालले भन्नुभएको छ, प्रहरी प्रसासन सरकारको मात्र हो कि जनताको सुरक्षाको लागि पनि हो ?
उहाँले यसका बारेमा विचार गर्न समेत सचेत गराउँदै भन्नुभएको छ, सिडियो साब साझा बन्न प्रयास गर्नोस अन्यथा भाद्र २४ को घटना नदोहोरिएला भन्न सकिन्न है बेलैमा चेत खुलोस् ।
